ತುಮಕೂರು(Tumakoru): ಸುಮಾರು 100ಕ್ಕೂ ಹೆಚ್ಚು ಜನರಿಗೆ ಮೋಸ ಮಾಡಿದ ಬರೋಬ್ಬರಿ 30 ಕೋಟಿ ರೂಪಾಯಿ ಸಮೇತ ಚಿನ್ನದಂಗಡಿ ವ್ಯಾಪಾರಿ ಪರಾರಿಯಾಗಿರುವ ಘಟನೆ ತುಮಕೂರಿನಲ್ಲಿ ನಡೆದಿದೆ. ಆಕಾಶ ಜ್ಯುವೆಲರಿ ಅಂಗಡಿ ಮಾಲೀಕ ಶಿವಾನಂದಮೂರ್ತಿ ಎಂಬಾತ 30 ಕೋಟಿ ರೂಪಾಯಿ ಪಡೆದು ಕುಟುಂಬ ಸಮೇತ ಪರಾರಿಯಾಗಿರುವುದು ಬೆಳಕಿಗೆ ಬಂದಿದೆ. ಇತನ ವಿರುದ್ಧ ಎಫ್ಐಆರ್ ದಾಖಲಾಗಿದೆ. ಯಾರೂ ಹಣ ನೀಡದಂತೆ ಸೊಸೈಟಿ ನಿರ್ದೇಶಕರೊಬ್ಬರು ಮನವಿ ಮಾಡಿದ್ದಾರೆ.
ಬಸ್ ನಿಲ್ದಾಣದ ಎದುರಿನ ಜಿಎಂಎಸ್ ಕಟ್ಟಡದಲ್ಲಿ ಚಿನ್ನದ ಅಂಗಡಿಯ ಜೊತೆಗೆ ಚೀಟಿ ವ್ಯವಹಾರ ಸಹ ಮಾಡುತ್ತಿದ್ದನಂತೆ. ಆಕಾಶ ಸಹಕಾರಿ ಕೋ ಆಪರೇಟಿವ್ ಸೊಸೈಟಿ ಶುರು ಮಾಡಿ ನೂರಾರು ಜನರಿಂದ ಶೇರ್ ಸಂಗ್ರಹಿಸಿದ್ದ. ಶೇರ್ ಹಣಕ್ಕೆ ಹೆಚ್ಚಿನ ಬಡ್ಡಿ ನೀಡುವುದಾಗಿ ಹೇಳಿ ಜನರಿಂದ ಹಣ ಪಡೆದು ಇದೀಗ ಪರಾರಿಯಾಗಿದ್ದಾನೆ. ಸೊಸೈಟಿ ಆಡಳಿತ ಮಂಡಳಿ ಶಿವಾನಂದಮೂರ್ತಿ ವಿರುದ್ಧ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಿದೆ.
